熱刺圍剿利馬素

猪拉多纳

普捷天奴向「前度」示威

俗語有話人比人、比死人，但好多時就算唔講出口都好，自己心裏面都會有各式各樣比較。就好似英超熱刺新帥普捷天奴咁，今晚領軍出戰歐霸盃附加賽首回合，造訪塞浦路斯球會AEL利馬素，睇落冇咩特別，其實AEL早前喺歐聯外圍賽被辛尼特淘汰，而辛尼特教頭保亞斯就係熱刺前任領隊，普捷天奴睇見「前度」咁醒，自己點能夠失威，捧2.22倍「讓客」冇走雞！

（開賽時間：周五凌晨0:00）

普捷天奴上季教緊修咸頓嗰陣，話過歐霸盃只係雞肋賽事，點知今季過檔熱刺就轉晒口風，激讚球會陣容夠深度挑戰各項比賽，仲話踢得歐霸盃就係為勝利而戰。加上睇見「前度」保亞斯早前喺歐聯外圍賽首回合輸畀AEL，最後要返到主場至反勝晉級，相信普捷天奴有所「比較」下，肯定想喺今晚首回合就搏盡贏波，實行攞彩兼向米飯班主證明自己。
蘇爾達杜 戴臣復出

更何況熱刺個頭開得唔錯，除季前熱身賽戰績彪炳外，日前英超開鑼戰作客韋斯咸，雖然唔夠半粒鐘就踢少個，但最終憑住中堅新援艾歷迪亞完場前絕殺對手。最重要係中場猛將賀治比同快翼安祖斯唐辛只係後備落場踢咗陣，前鋒蘇爾達杜同後衞戴臣更被收起，擺到明留力今仗，加上賓戴維斯同禾姆兩名新仔要博表現爭上位，今晚落場實自動波去到盡。

另邊廂，AEL利馬素教頭彼迪夫賽前受訪時，話要擊敗熱刺，減少犯錯最為關鍵，因為熱刺識得把握對手每個小錯誤，講真真係「行貨」到爆，但其實彼帥都有句說話幾中肯嘅，就係喺附加賽遇上熱刺，只能夠怪佢哋唔好彩，同埋想晉級難過登天。