馬體會新兵多攻「細」欠銳

猪拉多纳

上季盟主馬體會聯賽開鑼戰作客只能悶和華歷簡奴0:0，反映前線新兵默契未足，「張峰」相信馬體會今晚主場迎戰升班球隊伊巴，返到主場要攞晒3分應冇問題，但要大勝應有一定難度，今仗首選「入球細」。

（now632台及TVB13台周日凌晨3:00直播）

今季有迪亞高哥斯達離隊，教練施蒙尼隨即從拜仁簽入克羅地亞國腳文迪蘇傑填補空缺，加上法國國腳基沙文由皇蘇加盟，前線實力有增無減。不過新球員加盟往往需要時間建立默契，相信季初馬體會大勝嘅比賽唔會太多。後防方面，左閘菲臘路爾斯同門將泰拔高圖爾斯離隊，好在熱身賽所見防守力並冇走樣。

伊巴幾經辛苦解決財政問題征戰西甲，雖然質素有限，但勝在團結，球味十足，上星期西甲「處子戰」萬眾一心，主場擊敗中游分子皇蘇，全隊上下士氣大振，今晚作客上季盟主，喺冇心理包袱下預期會再有驚喜表現。