勁人+靚衫 皇馬型男開蘇

猪拉多纳

今晚西甲好戲，由皇家蘇斯達主場迎戰皇家馬德里，皇蘇上周作客升班隊伍伊巴輸0:1，周中歐霸盃仲畀名不經傳嘅卡斯洛達淘汰，個勢頹到咁，今晚就算有主場之利，睇怕都冇乜作為。適逢對家皇馬上力，而且今戰係佢哋備受矚目嘅作客戰衣第1次亮相，一於撐「銀河艦隊」1.78倍「讓球客勝」。

（now632台周一凌晨3:00直播）
皇蘇鐵三角解體

查實皇蘇近兩季嘅入球數字都唔錯，全賴阿基列斯、卡路士韋拿同基沙文呢個攻擊鐵三角做到嘢，不過基沙文今夏高價過檔馬體會，鐵三角即時解體！皇蘇仲唔識死，竟然失驚無神轉打單箭頭，重用上季走下坡嘅阿基列斯，反而將上季交出16個聯賽入球嘅卡路士韋拿放喺後備席，結果咪搞到前線啞晒火，近5場比賽只係入得1球囉，火力曳成咁，相信喺主場出擊，都好難惡得出樣。

皇馬開季係捧唔到西班牙超級盃，但都拎咗個歐洲超級盃，開鑼戰亦輕取科爾多瓦2:0，狀態慢慢冒升緊，講真，只要「銀河艦隊」發揮應有水準，又有邊隊係佢哋嘅手腳先！
C朗無隨軍J神孭飛

係，風頭躉C朗周中首膺歐洲足協最佳球員殊榮，雖然呢位王牌並無隨隊作客去皇蘇，但都仲有加里夫巴利、賓施馬同「新男神」占士洛迪古斯孭飛，中場又有卻奧斯同莫迪歷派牌，每個型男都着住件全新作客靚衫，要喺頹爆嘅皇蘇身上入波，簡直易過借火啦！