伐木者夫添上陣弗到震

猪拉多纳

上季美職常規賽西岸一哥波特蘭伐木者今季成績下滑，好彩呢隊波嚟到季尾發力，近七場聯賽贏咗四場，依家喺西岸掹車邊排第五，攞季後賽資格仲有價講，今場伐木者喺主場迎戰西岸尾二聖荷西地震，有望延續佳態，贏波搶分，熱捧1.6倍主勝﹗

（TVB 301周一清晨5時直播）
地震傷兵成籮

伐木者今場最大優勢就係能夠夫添上陣，烏魯迪、華拿里等主將狀態大勇，頻頻入波，連守將柏巴拉圖今場都刑滿復出，可同新將列治維喺防守中路拍住上。列治維之前喺英超搵食，踢過阿士東維拉、西布朗等球隊，呢位30歲中堅早前對科羅拉多急流一仗首次為伐木者上陣，即顯示其領導才能，喺後防經常向隊友提場，令球隊成績得以改善。反觀地震多傷兵，包括前鋒連赫特、中場馬迪亞斯加西亞同後衞湯美梅拿等，陣容天殘地缺，主勝捧得過！