象國受讓有雞偷

猪拉多纳

喀麥隆今非昔比

喀麥隆已經唔配「非洲雄獅」呢個名，喺巴西世盃醜態百出，對上一次贏得非洲國家盃冠軍更已係12年前，「雄獅」今非昔比，今場非國盃外圍賽D組賽事，喀麥隆喺主場迎戰「大象兵團」科特迪瓦，論人腳實力「大象兵團」梗係秤先，今場仲有得受讓咁筍，1.46倍讓球客勝咪走雞！

（周三晚上10時開賽）

以前一講起非洲國家球隊，好多人都會諗起喀麥隆，「非洲雄獅」曾七次殺入世盃決賽周，比其他非洲球隊都要多，佢哋更係首支喺世盃殺入8強嘅非洲隊，不過「非洲雄獅」依家已經雄風不再，球員踢波唔係為國家，而係為錢，喺巴西世盃開幕前就曾因獎金問題而威脅罷踢，喺世盃最後一仗對克羅地亞，唔單止狂吞4蛋出局，比賽末段仲發生內訌，認真醜死怪！
科特迪瓦夫添 謝雲奴弗爆

「象國」科特迪瓦喺今次非國盃外圍賽除咗宣布退出國家隊嘅「魔獸」杜奧巴之外，精銳盡出，上場對塞拉利昂，耶耶托尼、謝雲奴、韋菲特邦尼、沙洛文卡勞等主力悉數上陣，謝雲奴更上演個人騷入波助「大象兵團」反勝。喀麥隆除咗冇咗剛喺8月尾宣布退出國家隊嘅伊度奧之外，仲有伊高圖同桑治呢兩個星級球員落選大軍名單，今場實在讓唔起「大象兵團」。

今晚有咁多場非國盃外圍賽，阿King一於講多兩場畀大家參考吓，首先係剛果主場對蘇丹，剛果上場爆冷擊敗尼日利亞，球隊士氣大振，主勝值得一博。至於爆冷輸波嘅尼日利亞就要作客南非，「超霸鷹」今場定會更落力搶分，捧大盤﹗