侯城張開虎口吞錘仔

猪拉多纳

今輪英超壓軸戰，由「老虎」侯城主場火併韋斯咸。侯城喺轉會窗關閉前接連引入賓艾化等多名猛將，相反「錘仔幫」不但傷兵滿營，主帥艾拿戴斯仲批評眾將太過自大以致輕敵失分，咁多負面消息影響士氣，今晚深入「老虎竇」好難全身而退，侯城小讓平半梗係捧上盤。

（now 621周二凌晨3時直播）
韋斯咸殘陣輸埋信心

英超嘅轉播費收入相當和味，所以侯城為「錢途」着想，今季目標必定係留喺英超，因此佢哋早前喺歐霸外圍賽專登半力出擊，「求仁得仁」提早出局，避免兩頭唔到岸。除此之外，侯城喺今夏轉會窗臨閂前，先後羅致賓艾化、迪亞美、加斯頓拉美利斯及艾保靴南迪斯，三線實力得以補充，前三者早已喺英超搵食唔難適應，其中賓艾化一直畀人話佢有天分但唔落力，今次被借到侯城勢必打爭氣波，令批評者收聲。

另一邊廂韋斯咸就愁雲慘霧，唔單止長期十字兵安祖卡路爾有排都未復出，贊堅臣、占士哥連斯、馬菲查維斯及路蘭等三線主力仲養緊傷。同時，韋斯咸領隊艾拿戴斯表示眾將喺次輪擊敗水晶宮後，忽然信心爆棚，搞到之後一場英超對修咸頓領先一粒下慘遭反勝，狠批球員贏波就囂張，輸波即變縮頭烏龜，仲打算搵心理專家，希望改善球員嘅比賽心態。不過遠水難救近火，加上陣容天殘地缺，「錘仔幫」今晚作客侯城難作惡，主隊小讓平半，呢個上盤有買趁早。