韋斯咸強鋒拆「城」

猪拉多纳

班主兇球迷，新兵冇得踢！侯城依家亂晒大龍，領隊布魯士忙住做公關show唔得閒教波，就算佢哋今晚鬥韋斯咸有主場之利，亦讓唔起對手平半，一於捧2.03倍下盤！

（now621周二凌晨3:00直播）
侯城上下唔團結

侯城班主艾林早前唔理球迷反對，想將隊波改名做侯城老虎。上星期英格蘭足總唔點頭，呢位埃及籍老闆隨即發老脾，恐嚇球迷話下個月仲改唔到名就賣盤走人。雖然佢之後知衰改口話冇諗過賣盤，不過已經狠狠打擊球員同球迷嘅士氣。

結果布魯士近排頻頻出嚟撲火，指艾林想走就唔會喺轉會窗關閉前，掟過千萬鎊出嚟引入4位新兵。點知以破球會轉會費紀錄加盟嘅前鋒艾保靴南迪斯又唔生性，因為簽證問題延遲入境報到，今晚亮相機會唔大。全隊上下不停為布魯士製造混亂，仲點專心備戰吖！
韋斯咸往績佔優

另邊廂韋斯咸同樣喺轉會死線前簽入中場艾馬菲達奴，配合射手安拿華倫西亞、中場桑治戰鬥力唔曳。而且「錘仔幫」近6次同侯城交手輸得1次，今晚趁住對手立立亂隨時搶到分都唔出奇。