基格納弗爆 馬賽聖算高

猪拉多纳

馬賽對波圖早陣子熱爆全城，不過Out晒啦，依家？馬賽對聖伊天先至最Hit呀！兩支夾埋贏過19次法甲冠軍嘅球隊季初表現Sharp醒，今周火併合演前列大戰，預期會鬥得燦爛，絕對唔會好似馬賽對波圖咁，半場0:0，全場1:1咁齋。

（TVB302周一凌晨3:00直播）
聖伊天作客走樣

馬賽自第2周吞蒙彼利埃雙蛋後連贏5場直上榜首，轟入19球更冠盡法甲，勢兇似狼絕非純純兔，呢刻邊個仲記得華布拿呀？大家只係知道馬賽無「格」唔掂，講緊嘅係基格納，上季被人笑肥到似巨無霸，但近期佢着晒火，連續3場有進帳，開季7戰入8球排射手榜首位，強如伊巴謙莫域都要行埋一邊，恩師圖盧茲教頭卡辛路華對基格納讚不絕口，迪甘斯或者都後悔無選佢入世盃大軍，嚟緊可能會重召呢位前鋒，除了基格納，馬賽仲有阿休、泰奧雲及皮耶等多個得分點，不愁入波。教練比爾沙好醒目，呢個時候為球員減壓降溫，話爭標言之尚早，最重要係保持近期強勢。

聖伊天上周中賽和波爾多1:1，但查實機會多的是，兩閘經常助攻，麥斯格拉度表現搶鏡，17歲新星辛特麥斯明亦好有活力，只係雲禾夫斯雲高、蒙尼巴基等把握力太差，間接令聖伊天失分，隊長盧斯佩連同夏蒙馬今場續養傷，佢哋主場硬淨，惟作客戰績一般，試過0:5慘敗畀聖日耳門、歐霸盃不敵卡拉布克，睇嚟如果要捧一隊，諗清楚、睇清楚、聽清楚，小弟一定揀馬賽。