安德列治唔怕殘兵多蒙特

猪拉多纳

德甲勁旅多蒙特新一季飽受傷兵問題影響，搞到喺聯賽嘅排名要用大碼iPhone先睇得到，排第12位，啱啱仲喺魯爾區打吡戰不敵史浩克04，士氣受挫，今場「蜜蜂軍團」喺歐聯D組作客比利時勁旅安德列治，真係惡唔出樣，捧受讓嘅安德列治﹗

（周四凌晨2時45分開賽）

多蒙特嘅傷兵成籮，科娜係咁易講吓當中幾位養傷主將，包括馬高列奧斯、巴拉斯塞高斯基、紐尼沙軒、米希達利恩，仲有養傷超過一年後終於傷愈、但未夠fit嘅根度簡，全部都係中場球員，「蜜蜂軍團」真係黑仔到極點，搞到踢咗6場德甲已經輸咗3場，仲同死敵拜仁爭7分咁多。即使主帥高普幾有料，面對咁嘅問題都會束手無策，今場作客實在讓唔起安德列治。
安軍「阿蘇」一樣唔嘢小

巴塞隆拿前鋒蘇亞雷斯除咗有一招咬人絕技，扭波射波都係不得了，其實安德列治都有位「阿蘇」，阿根廷籍嘅馬迪亞斯蘇亞雷斯，呢位攻擊球員雖然冇咬過人，但同樣有腳法有射術，當然冇正版「阿蘇」咁屈機，不過都唔渣囉，曾經傳過阿仙奴對佢有興趣﹗排喺比甲榜首嘅安德列治9場聯賽不敗，馬迪亞斯蘇亞雷斯踢足之餘更交出4入球2助攻，狀態大勇，睇嚟今場安德列治又係靠佢食胡，捧讓球主勝﹗