作客英倫例腳軟 加拉入廠聽做炮灰

猪拉多纳

彭迪夫啞火 史奈達Hea踢

歐聯分組賽又有好戲睇，阿仙奴今晚喺D組主場對加拉塔沙雷，主W熱都要捧。雖然阿仙奴再次變成「傷兵工廠」，不過加拉塔沙雷作客英倫例牌腳軟，新簽射手彭迪夫未開齋之餘，中場大腦史奈達又Hea踢走晒樣，今戰唔似惡得出樣囉！

（有線64及203周四凌晨2:45直播）

原本阿仙奴已經大把傷兵，前鋒基奧特、耶耶辛洛高、翼鋒禾確特同右閘迪保治全部未好番，點知剛戰英超主場以1:1打和熱刺，隊長阿迪達、中場艾朗藍斯同韋舒亞都傷埋，而且嚟緊佢哋又要喺聯賽作客車路士，聽落都戥佢哋擔心。

不過兵工廠喺歐聯分組賽首戰，作客多蒙特已經淨吞雙蛋，今場再失分嘅話，出線形勢就會好被動，就算緊接要喺倫敦打吡戰鍊「車」，睇怕領隊雲格都會贏埋今場至算。再講阿歷斯山齊士同辛迪卡索拉今場好大機會復任正選，拍住韋碧克攻堅，戰鬥力都絕對唔失禮！
韋碧克A山擔正 阿仙奴鋒力唔失禮

至於客軍加拉塔沙雷，今季請嚟意大利教頭柏蘭迪利掌帥，可惜開季表現麻麻，首場歐聯分組賽主場只係以1:1賽和安德列治，而且柏帥上任至今，班波前鋒線依然未撻着，新簽入嘅拿玻里射手彭迪夫加盟後4次上陣都冇波入，旨意佢打救蛇都死。

咁都未算慘，加拉塔沙雷打歐洲賽不嬲靠「地獄主場」搵食，作客好多時都腳軟，例如佢哋以往造訪英格蘭球隊，就得3和6負完全冇料到，中場指揮官史奈達仲要步入職業生涯尾聲，非常Hea踢，相信加拉塔沙雷要擺低3分至走得。