波琴紐倫堡爆大戰

猪拉多纳

阿King今晚冇約人，諗住喺屋企睇波，揀三場直播波玩過關，到時睇得刺激啲！先講場德乙波琴對紐倫堡，波琴上仗大敗，被打破今季不敗之身，難免會洩氣，反觀紐倫堡力挫強隊凱沙羅頓，終止三連敗，中場舒賀夫入兩球，但防線仍然不穩，捧入球大為妙。

（有線64及203周六凌晨零時30分直播）

跟住就搵埋場法甲蘭斯對波爾多，蘭斯近兩場吞八蛋，今場仲有上仗領紅被逐嘅後衞馬雲加及中場艾碧克停賽，戰鬥力減弱，即使今場主場出擊都會主守，而波爾多今季演出四平八穩，但係佢哋作客蘭斯一向成績一般，相信都係穩中求勝，揀細盤仲好。

（TVB302周六凌晨2時30分直播）
黑池旺「半場和」唔怕追

最後英冠黑池對卡迪夫城，兩軍可以話水鬥水，卡城炒咗蘇斯克查後球隊有啲起色，而黑池喺主帥荷西列加領軍下以守為主，故連開五場半場和，今場一於再追！

（TVB301周六凌晨2時45分直播）