葡國囂唔起撐法國

猪拉多纳

C朗寸爆拒同阿蘇攞金靴

効力皇家馬德里嘅葡萄牙天王基斯坦奴朗拿度（C朗），今季火速入局，球季踢咗冇幾耐已經省入13個聯賽入球，C朗亦同上季喺利物浦嘅烏拉圭射手蘇亞雷斯，一齊攞到歐洲金靴獎，歐洲足協本來安排咗佢兩個喺本月15日齊齊領獎，不過，據西班牙《體育報》爆料，C朗唔想畀「阿蘇」搶鏡，拒絕咗本月15日嘅邀請，改喺11月至自己單獨攞獎，認真夠寸！
冇人用竟重召卡維奴

C朗有料自然寸得起，可惜葡萄牙唔係皇馬，平時搭開卻奧斯、加里夫巴利同莫迪歷嘅佢，喺國家隊拍住班「豬一般的隊友」，就要靠自己，樹大招風隨時冇啖好食。C朗會喺今晚重返葡萄牙國家隊，作客同法國踢熱身賽，但首度領軍嘅葡萄牙新帥費蘭度山度士，上任後竟然要重召36歲中堅卡維奴及31歲翼鋒哥利斯馬入隊，冇人用到咁，睇怕佢老人家識變魔術都未必救得到葡萄牙。

（有線64及203台周日凌晨2時45分直播）

法國喺迪甘斯執教下穩打穩紮，主力好似賓施馬、卡比耶同華布拿都正值當打之年，加埋保羅普巴呢件上位超新星，整體戰鬥力可以話係贏葡萄牙幾條街！賽前有消息話，事隔1年獲重召嘅馬賽鋒將皮耶將會擔正，聯同華布拿、基沙文同賓施馬攻堅，呢個法蘭西前線組合咁得人驚。葡萄牙喺呢場「2006世盃4強翻版戰」點頂得住呀，一於撐法國贏波。