法國殺無赦 唔畀面水貨施丹

猪拉多纳

2016年歐國盃東道主法國繼續寓賽於操，今晚作客搵咗阿美尼亞「拍跳」，雖然後者近年擺脫魚腩惡名，但「阿美尼亞施丹」米希達利恩因傷缺陣，難擋弗到漏油嘅「高盧雞」來襲，不妨直取讓球客勝。

（有線61、64、201及203台周三凌晨零時直播）
阿美尼亞士氣受挫

自從有「阿美尼亞施丹」之稱米希達利恩崛起後，該國不再係人見人蝦嘅魚腩部隊，上年世盃外作客大勝丹麥4比0更係代表作。不過佢今輪國際賽因傷落選，冇咗呢位多蒙特球星單天保至尊，阿美尼亞即時跌Watt，上仗歐國盃I組外圍賽臨完場失守，慘遭塞爾維亞逼和，痛失兩分士氣大受打擊。今屆歐國盃外圍賽每組有六隊，只有I組得五隊，由於法國係東道主於外圍賽免役，因此歐洲足協規定，每輪I組輪空嗰隊將與法國「拍跳」，並且唔會計分，今次則輪到阿美尼亞。

其實「高盧雞」於今夏世盃已告復甦，殺入八強令人眼前一亮，雖然箭頭賓施馬上場對葡萄牙後報稱有傷，今仗或掛免戰牌，但其他射手雷米、基格納或中場保羅普巴一樣咁弗，法國要贏實力差幾條街嘅阿美尼亞兩粒冇難度啦！