體育總監倒戈 漢堡睇透賀芬咸

猪拉多纳

黑柴係漢堡fans，球隊今季動作多多，會方確有中興決心，季初表現飄忽，明顯係需要時間從頭做起，除咗增兵增強實力外，球隊管理層亦不斷改革，經過國際賽休戰期後，相信會有更穩定表現，漢堡今晚主場面對黑柴第二愛隊賀芬咸，有熟悉客軍虛實嘅體育總監彼德斯倒戈，平手盤我捧漢堡。

（有線61及64台周日晚9時30分直播）
領袖雲達華治復出

漢堡今季喺德國第8富豪古恩資助下大事擴軍，新加盟嘅比哈美、賀治比、尼古拉梅拿同奧斯特蘇歷等球員無疑令球隊人腳實力大為提升，季初成績曳但換帥夠快，踢完三輪即刻由新帥辛巴亞接手，呢個年輕教頭雖然冇執教德甲經驗，但喺提升球員士氣同紀律方面已見成效，今季回歸嘅主席比亞斯多化仲不斷為佢提供助力，今個月撬走瑞士足總技術總監簡拿貝爾過檔，佢一加盟球隊即爆大冷，作客擊敗多蒙特，士氣大振。喺國際賽休戰期亦傳來好消息，中場大將雲達華治終於傷愈可以復出，雖然呢位荷蘭球星上季表現平平，但始終係球隊精神領袖，連新加盟嘅德國新星尼古拉梅拿都話，有得同雲達華治合作，係佢選擇加盟漢堡嘅主因，佢好期待今晚兩人合作可以擦出火花。

漢堡教練辛巴亞今晚仲有更強助力，係今年七月加盟球隊嘅體育總監彼德斯，佢喺賀芬咸擔任體育總監多年，協助母會由地區球隊殺上德甲，佢同賀芬咸教練基斯度老友鬼鬼，不過今晚各為其主，賽前佢就特別同辛巴亞分析基斯度嘅戰術，作出針對性部署。賀芬咸目前雖然以不敗身位列聯賽榜次席，但作客表現同成績都唔算突出，漢堡計人腳並唔輸蝕，主場唔使讓波，有力坐和望贏。