曼城谷氣搵錘仔幫洩憤

猪拉多纳

(六)7 韋斯咸 Vs 曼城

今晚英超早場有韋斯咸主場對曼城，勢估唔到韋斯咸踢咗8場聯賽竟然有13分，排喺第4位，不過今場對住「藍月亮」就唔同講法，爆冷嘅機會微乎其微，唔單止係實力上嘅差距，更加係因為曼城喺周中歐聯失分谷住成肚火，要搵「錘仔幫」發洩，今場讓球客勝唔怕追﹗

（now 621周六晚7時45分直播）
阿古路弗爆博首球

韋斯咸贏嘅4場波，當中3場嘅對手係水晶宮、昆士柏流浪同般尼，實力唔強，而另外贏利物浦嗰場，都係因為「紅軍」狀態低迷先贏得咁輕鬆。但係「錘仔幫」今場嘅對手唔係人咁品，曼城喺英超連贏三場，場場都至少贏兩球或以上，射手阿古路弗到漏，計埋歐聯，連續5場都有波入，有4場更係先開紀錄，首名入球可以考慮佢。

「藍月亮」雖然喺周中歐聯遠征俄羅斯，體力較「錘仔幫」蝕底，但正正係遭莫斯科中央陸軍逼和而激起成班球員嘅鬥心，領先兩球都可以出醜畀人逼和，呢班球星實會覺得好冇面，今場更加要搵韋斯咸嚟發洩怒火，讓球客勝值捧。