西班牙冇迪哥仲易劏魚腩

猪拉多纳

衞冕嘅西班牙喺歐國外C組主場迎戰弱旅白俄羅斯，雖然車路士鋒霸迪亞高哥斯達今次落選大軍名單，但呢位衝得撞得嘅中鋒同「鬥牛國」tiki taka踢法格格不入，冇咗佢阻頭阻勢反而係好事，用番腳風甚順嘅新仔柏高艾卡沙效果隨時更佳，讓球主客和讓到兩球都要讓球主勝。（有線61及201台周日凌晨3時45分直播）

西班牙嘅tiki taka踢法強調控球在腳，但喺車路士入波不斷嘅迪亞高哥斯達，卻係擅於快速反擊嘅衝刺型中鋒，硬係同隊波唔多夾，加上佢之前兩次為國披甲帶傷而回，搞到車仔主帥莫連奴嬲到發晒爛渣，西班牙領隊迪保斯基今次索性唔召「迪哥」入伍。
柏高艾卡沙趁機上位

不過唔揀佢並非壞事，因為迪帥仲有柏高艾卡沙，呢位華倫西亞新星靈巧得嚟速度快，臨門一腳亦異常冷靜，連續三輪歐國外有士哥，腳風順過「迪哥」多多聲喇，配合艾斯高、佐治高基等支援，重拾tiki taka踢法令進攻更流暢，要大勝三戰不勝嘅冇骨魚腩白俄羅斯唔難，斯維力撐讓球主勝。