侯城熱刺齊獻「細」

猪拉多纳

英超尾場熱刺則作客「老虎」侯城，前者箭頭艾迪巴約麻煩多多，搞到陣內軍心不穩，不過侯城亦係傷兵滿營，實在捧唔落手，累鬥累格局唔慌多波入，斯維寧揀細盤。

（now 621周一凌晨零時直播）
艾迪巴約擾亂軍心

正所謂江山易改、本性難移，麻煩友艾迪巴約今季又故態復萌，唔單止冇乜波入，之前主場輸畀紐卡素後，佢竟有心情帶對方球員去熱刺更衣室隔籬間房談笑風生，已惹來隊友不滿，跟住又話寧願在客場比賽，因為喺主場成日畀熱刺粉絲柴台，日前更爆出疑患被害妄想症，仲趕阿媽出街，搞咁多「出位」新聞，唔多唔少都影響熱刺形象，難怪有傳佢會喺明年1月轉會窗重開被拋售。

雖然主帥普捷天奴稱依家唔係互相指摘嘅時候，必須團結一致，但佢咁樣講，亦間接反映咗軍心不穩嘅情況。的確以熱刺嘅人腳，現時僅排中游實在令人失望，翼鋒安祖斯唐辛及左閘丹尼路斯都有傷在身，要等到最後體測先知能否落場，上仗對史篤城直接領紅牌嘅右閘基爾洛頓，今仗要坐波監，普捷天奴都咪話唔頭痕。
老虎遇強變縮頭龜

另一邊廂，侯城領隊布魯士同樣受困於傷兵問題，除咗囝囝阿歷斯布魯士及熱刺棄將戴臣兩大守將倦勤外，謝拉域亦上陣成疑，呢位克羅地亞前鋒對上4場缺陣，侯城未贏過之餘只入得兩粒咁大把，仲有3仗係冇士哥添，況且「老虎」對親強隊都變「縮頭龜」，穩字行先博搶1分，睇嚟今仗會處於膠着狀態，入球細有1.75倍咪嫌少。