兵工廠和波訶呢吉帝

猪拉多纳

點解漂亮足球秋冬勝利唔係內行名帥杯茶呢？因為北半球嘅球隊往往只能喺季初，即是秋天或者初冬時攞到好成績，未必可以去到五月夏天來臨時一放到尾，攞到冠軍；現階段只係一個過程，仲未算係結局。
車仔未有資格牙擦擦

所有球迷都只會記住邊支球隊攞冠軍，佢哋唔會理邊隊踢漂亮足球而攞亞軍，呢個的確係現實，亦係理性內行人嘅宣言。因此，今季開頭開得好好嘅車路士，主帥莫連奴最近就忠告自己班球員，叫佢哋唔好咁牙擦，原因係陣中除泰利、杜奧巴同施治外，其他球員都未曾攞過冠軍，如果到明年五月時真係可以攞到冠軍，呢班球員先至就有資格牙擦！

至於喺英超同埋歐聯成績都係差強人意嘅阿仙奴同利物浦，今晚將會分途出擊。「兵工廠」會喺主場對多蒙特，筆者相信佢哋喺聯賽打得咁差，主帥雲格最希望今晚可以打和「蜜蜂兵團」，兩隊齊齊喺分組成為一、二名出線，咁就可以減少外界對雲格嘅質疑。

利物浦作客對住同組包尾嘅盧多格德斯就真係非勝不可，因為紅軍喺聯賽已經連輸三場，若然今場歐聯賽事都贏唔到，攞唔番個優勢同出線權，主帥羅渣士肯定會聞到「魷魚香」！

金句：漂亮足球秋冬勝利唔係內行名帥杯茶