紅軍有排衰 撐硬史篤城

猪拉多纳

近排頹到冇朋友嘅利物浦返到英超，主場對住排名仲高佢一格嘅史篤城，睇怕又係出醜收場！紅軍喺周中歐聯連名不經傳嘅盧多格德斯都贏唔到，後防頻頻犯錯，信心蕩然無存，唔好話我踩到紅軍一文不值，事實係依家邊隊對住紅軍都至少可以保住不敗，今晚獲受讓嘅史篤城肯定捧得過！

（now 622周六晚11時直播）

利物浦今季有咩問題真係講到口都臭，但就從來都冇改善到：進攻冇板斧，死都要打單箭頭；防守勁多甩漏，成日輸死球；門將米洛列特唔係一級鋼龍，上仗對盧多格德斯更「牛油手」出醜。唉，身為利迷嘅科娜真係睇唔到有咁多問題嘅紅軍今場可以反彈，佢哋既然連水晶宮都輸得，對住實力更強嘅史篤城會贏到咩？史篤城球迷應該都會對愛隊今季嘅表現收貨，作客仲要贏過曼城同熱刺，依家喺積分榜排緊第12位，排名比上幾季同期都要高，紅軍今場要贏真係幾抿水﹗

阿仙奴食住西布朗

至於早場嘅阿仙奴作客西布朗，「兵工廠」狀態冇紅軍咁曳，起碼仲有個弗爆射手阿歷斯山齊士撐住，啱啱喺歐聯擊敗多蒙特令眾將重拾信心，西布朗最近3季對住阿仙奴，7戰輸咗5場，今場客勝可以放心捧場。

（now 621周六晚8時45分直播）