錘仔扑天鵝 捧下盤好過

猪拉多纳

英超今晚有話題賽事上演，由兩支冇咩人估到會躋身前列嘅球隊對碰，韋斯咸喺主場讓史雲斯平半，捧下盤好過。雖然韋斯咸近排幾順，但史雲斯最近搞緊造勢大行動，提早派聖誕禮物宣布主場季票減價，希望吸引更多球迷撐，呢個時候點衰得呀？

（now621台周日晚9:30直播）

8月個陣，韋斯咸球迷舉晒橫額、大聲嗌要求領隊艾拿戴斯走人，點知依家佢領軍位列聯賽榜第5位，最近兩個星期連贏西布朗同紐卡素，就連荷里活女星《魔盜王》女主角姬娜萊莉出席真人騷節目，都忍唔住話自己係「錘仔迷」。
史雲斯造勢唔衰得

事實上，韋斯咸教頭艾拿戴斯同迪亞法沙高，分別當選英超10月最佳領隊同球員，娜萊莉更加話，韋斯咸早排喺主場以2:1打沉曼城，令佢覺得有大財團撐腰唔係大晒，大快人心喎，可想而知，呢期韋斯咸嘅人氣真係冇得頂。

另一方面，史雲斯嘅季票原本已經唔係貴，但佢哋嘅高層依然決定下季每張季票減10鎊，實行趁近排走勢唔錯，吸引更多球迷支持，我就唔信佢哋今場會揸流攤，而且射手韋菲特邦尼要為下季轉會鋪路，就算後衞尼爾泰萊停賽，都有條件頂住唔輸。