祖雲達斯贏硬里

猪拉多纳

派路復出 泰維斯弗爆

意甲今晚上演兩場好波，頭場由卡利亞里喺主場對祖雲達斯。最近卡利亞里嘅前線幾乎癱瘓，就連教練薛文都認低威話球隊火力不足，想搶到分都難，撞正祖記有中場指揮官派路復出，射手泰維斯弗爆，1.37倍客勝穩開！

（TVB301周五凌晨2:00直播）
卡利亞里鋒線啞火

依家卡利亞里排喺聯賽榜倒數第3位，日前佢哋作客0:0打和帕爾馬後，累積近8場不勝紀錄，教練薛文仲話執到1分已偷笑。冇計啦，佢哋連續3場聯賽冇波入，好大原因係射手馬高沙奧未好番，就算前鋒域陀伊巴保坐完波監復出都難有士哥。

祖記日前喺主場被森多利亞逼和1:1，聯賽主場25連勝走勢結束，而且榜首優勢縮窄到得1分，簡直畀羅馬追到氣咳，搞到教練阿里基被球迷狂鬧。之不過，近日祖記隊長保方已幫手平息民怨，佢話阿里基嘅4後衞陣式，更加適合打歐聯，嗌球迷畀啲耐性先。
「野獸」表明效忠

雖然祖記中後場有唔少傷兵，但佢哋有後衞基亞連尼坐完波監踢得番，中場派路經過上場休息後，叉滿電可以落場搏殺，牌面依然夠砌。仲有呀，射手泰維斯出席意甲頒獎禮期間，親口話根本冇諗過返小保加，表明效忠祖記，今場仲唔入多幾球騷哥利咩！