曼城超強勢客勝嗒糖

猪拉多纳

曼城辛辛苦苦終於追到同車路士同分，梗係唔想再次畀車仔拋離，好彩今晚作客對手只係聯賽4連敗嘅愛華頓，即使耶耶托尼出戰非國盃缺陣、阿古路同迪斯高未知趕唔趕得切傷愈復出，科娜相信「藍月亮」都夠晒料砌低「拖肥糖」，照捧客勝！

（now 621周六晚11時直播）

曼城上半季初段好多時候靠晒阿古路一個，其他隊友撻極唔着，搞到「阿古獸」一啞火，球隊就勁易失分，不過當人人都以為阿古路受傷後會拖累球隊，但大衞施華、拿斯尼、耶耶托尼等又突然上晒力，唔單止幫「藍月亮」絕地出線歐聯，仲趁住車仔連環失分，喺英超追到同分。依家佢哋個勢咁強，即使已經復操嘅阿古路同迪斯高未知今場能否上陣，而非洲足球先生耶耶托尼亦因出戰非國盃而缺陣，但曼城仍有足夠實力擊敗態沉嘅愛華頓。
愛華頓頹爆唔夠揪

愛華頓近況頹爆，快車賽程4戰全敗，上場英足盃對韋斯咸要靠補時階段盧卡古嘅入波驚險逼和1比1，「拖肥糖」今季成績曳，球員出現信心危機，甚至開始質疑主帥馬天尼斯，向佢表示希望喺戰術上作出改變。依家「拖肥糖」內部問題多多，主場受讓一樣咪掂，都係捧曼城客勝啦！