阿仙奴半場勝好路

猪拉多纳

奧斯爾餓波搶韁爆白禮頓

今晚英格蘭足總盃第四圈壓軸好戲，由氣勢如虹嘅阿仙奴作客英冠仔白禮頓。兵工廠依家傷疲盡起，尤其係中前場呈現人滿之患，搞到貴價貨奧斯爾都要屈居後備；今仗難得有機會正選披甲，「大眼仔」仲唔搶韁騷哥利畀主帥雲格睇咩？斯維力撐阿仙奴半場勝。

（now 621及633周一凌晨零時直播）

身為阿仙奴史上「標王」，奧斯爾自上季加盟後表現未如人意，成為眾矢之的，今季更受重創要抖三個月，喺球隊最艱難時刻都幫唔到手。好彩西班牙中場辛迪卡索拉及時挺身而出，無論移後一格打防中，定係推前做番派牌一樣冇失拖，搶眼演出令人忘記咗奧斯爾，就算「大眼仔」已傷愈亦搶唔番正選，卡索拉近日揚言自己在中路發揮比邊路出色，擺明向奧斯爾宣戰。
大眼博表現爭正選

除咗辛迪卡索拉之外，阿仙奴仲有阿歷斯山齊士、路斯基同阿歷士張伯倫等中前場球員弗到震，奧斯爾要重奪主力之位絕非易事。由於今仗只係出戰英冠仔白禮頓，主帥雲格話會作出適當輪換，意味奧斯爾嘅機會嚟喇！話晒都係德國勇奪世盃冠軍嘅功臣，依家喺阿仙奴連正選都不保，真係乜面都冇晒，難得今仗大有機會擔正，佢一定施展渾身解數。

雖然白禮頓早前改由前諾域治教頭曉頓接手有番啲起色，但佢哋喺聯賽排緊尾六，相信首要任務係保住英冠席位，無暇分心盃賽，面對以勁餓波嘅「大眼仔」、禾確特及施捷斯尼為首嘅阿仙奴，隨時半場都頂唔住，兵工廠嘅半場客勝有1.85倍咪嫌少。