ＡＣ帕爾馬鬥衰鬥入波

猪拉多纳

昔日有「迷你世界盃」美譽嘅意甲，近年每況愈下，主因係「五行欠水」被迫賣球星，搞到成個聯賽冇晒吸引力，惡性循環下令競爭力大減，唔單止被西甲同英超放甩幾條街，就連德甲及法甲都迎頭趕上，不勝唏噓。不過，快將重開嘅歐霸盃32強，竟有五支意甲球隊角逐，與以往一到淘汰賽幾乎全軍盡墨大有分別，因為今屆歐霸冠軍可獲得一張來屆歐聯入場券，難怪佢哋忽然搏命喇。

講到莫財，原本今季有份踢歐霸嘅帕爾馬，先係財政問題被剝奪資格，跟住喺聯賽跌到落包尾，點解落差咁大？咪又係錢作怪。打工仔最怕有汗出冇糧出，「壞孩子」卡斯辛奴已率先「跳船」解約，但該隊仍拖欠球員逾2000萬歐元人工，眾將指若今個月出糧日仲唔找清條數，將會告上體育法庭，唔排除會罷踢添，大軍士氣低落，隊波瀕臨破產邊緣。不過，帕爾馬今晚聯賽作客嘅對手AC米蘭亦唔好得幾多， 佢哋剛於意盃出局，後防又錯漏百出，好彩佢哋啱啱借到羅馬前鋒迪斯度幫手，隨時以攻代守，初盤AC要讓一粒唔多穩陣，轉玩大盤好過。