紅軍「黑鷹」夾計做細界

猪拉多纳

今晚歐霸盃32強展開首回合角逐，利物浦同比錫達斯會師晏菲路球場，「紅軍」要再次面對英超失冠仇人丹巴巴亞，「黑鷹」又有慘吞利物浦8蛋嘅慘痛回憶，兩軍受過去陰影所困擾，今場踢落隨時綁手綁腳，玩1.87倍入球細啱數。

（有線61及201周五凌晨4:05直播）
再遇仇人丹巴巴亞

利物浦隊長謝拉特上季「跣腳失冠」事件，相信球迷都記憶猶新，試問「紅軍」球員又點會忘記吖！今場再會丹巴巴亞難免有種莫名嘅恐懼感，唔敢壓得太前避免失作客入球。再講「紅軍」冇咗謝拉特、盧卡斯喺中場壓陣已經差咁截，翼鋒史達寧同拿沙馬高域又一個養傷一個停賽，前線嘅史杜列治隨時孤立無援。

至於比錫達斯就受到「吞蛋陰影」籠罩，佢哋喺07年歐聯分組賽造訪晏菲路，慘吞利物浦8隻光蛋，創下歐聯史上正賽最懸殊比數嘅羞家紀錄。呢隻「黑鷹」見過鬼都怕黑，喺今屆歐聯附加賽鬥阿仙奴，同埋歐霸盃分組賽鬥熱刺兩支英超隊伍，4場波都踢得相當「腳緊」，冇場交收多過兩球，今場再遇「紅軍」怕且「細」成定局咯！