布倫瑞克冬眠未醒任「仁」劏

猪拉多纳

近排炒人炒上癮嘅拜仁慕尼黑今晚會出戰德國盃第3圈賽事，主場迎戰來自乙組嘅布倫瑞克。拜仁本身喺德甲實力超班，加上隊波呢排殺得性起，今次對住乙組仔實食冇黐牙，即使「-2」，1.53倍「讓主」都穩陣。

（無綫翡翠台周四凌晨3:30直播）
拜仁頻派蛋

拜仁最近頻頻喺國內大開殺戒，繼以8:0同6:0屠宰漢堡、柏達邦後，日前亦以4:1擊潰科隆。拜仁殺氣咁大，真係唔敢同佢哋對着幹。更何況就算佢哋收起部分主力，都仲有前鋒比沙路、中堅丹迪、中場沙比阿朗素同門將連拿呢班星級後備等做打手上位。以佢哋嘅質素打德甲甚至歐聯都唔輸蝕得去邊，個個身經百戰，想佢哋衰輕敵出事唔易囉。

對手布倫瑞克歇冬後取得1和3負，班波明顯仲處於冬眠狀態，加上一對箭頭夏華尼爾遜、古普基仲打埋柴，仲邊有運行吖？呢鋪作客慕尼黑，睇怕都係劫數難逃。