獅吼洩憤糟質流浪者

猪拉多纳

布里斯班獅吼喺星期日澳職鬥威靈頓鳳凰，由於受暴雨影響，球證最後決定腰斬比賽，並按照聯賽規例判當時落後嘅獅吼輸波，激到教頭法蘭斯菲臣紮紮跳，鬧爆賽例無稽，佢哋今日聯賽主場遇着榜尾嘅西悉尼流浪者，肯定搏命入波搵對手發洩，熱捧1.56倍主勝。

（開賽時間：周三下午5:00）
被屈輸波一肚火

獅吼首席射手軒歷基安達迪喺上星期亞冠盃整親，日前證實要接受膝部手術，最壞情況係提早收咧。雖然呢個壞消息無疑大大打擊獅吼鋒力，但好在獅吼仲有卡路查奴域同班頓波里路擔大旗，佢哋近4場波夾手夾腳整咗4粒，今場對住聯賽作客場場有失波嘅西悉尼，應該唔難搵到食啫。

喺聯賽包艇嘅西悉尼，今季10場客戰僅得1和9負，唯一和波係鬥排倒數第2嘅紐卡素噴射機，狀態曳到震。最弊西悉尼傷兵成籮，前鋒馬克布歷治、中場馬迪奧普積克、後衞史柏拉洛域等近半打主力唔踢得，就連前線最煞食嘅杜米祖歷都被澳洲國家隊搶走埋，今場造訪布里斯班，聽抬蛋啦！