柏圖擔大旗 聖保羅追素

猪拉多纳

南美自由盃第2組，名牌鋒線大作戰！由柏圖孭飛嘅聖保羅作客阿根廷球隊聖羅倫素，擁有荷西古里路及路夫嘅哥連泰斯主場鬥烏拉圭球隊達奴比奧。柏圖成功洗脫「玻璃腳」污名，今屆自由盃已有兩球進帳，夥拍「側擊王」米高巴斯圖斯，進攻夠多元化。聖羅倫素落後對手三分，今仗不容有失，必搏盡求勝，首選入球大。

（馬會網上文字直播，周四早上6時45分開賽）

柏圖兩年前返回巴西搵食後，傷患明顯減少，上季巴甲有九球進帳，成為球隊首席射手之一。佢今屆自由盃對達奴比奧梅開二度，表現Sharp醒。雖然拍檔路爾斯法比安奴有傷在身，上陣成疑，但陣中仲有前里昂快翼米高巴斯圖斯；呢位前巴西國腳出名突破力強，而且擅於遠射，聖保羅首循環就係靠佢一箭定江山擊敗聖羅倫素。聖保羅目前喺第2組排次席，落後榜首哥連泰斯三分，今場必定強攻對手。

聖羅倫素三戰僅得三分，今仗再唔贏好可能出局，勢必豁出去一搏。球隊狀態不俗，上仗聯賽大勝拉魯斯4比0，前鋒莫路麥圖斯又入兩球，近兩仗已有三球進帳，夠本錢同聖保羅駁火。
哥連泰斯炒起達奴比奧

至於哥連泰斯主場對達奴比奧，哥連泰斯三戰全勝，曾經効力拜仁慕尼黑嘅秘魯名將荷西古里路上輪入波，助球隊作客擊敗達奴比奧。會方年初簽下曾去過莫斯科中央陸軍及中超搵食嘅前巴西國腳路夫，卡士十足。達奴比奧三戰全敗，失咗八球，明顯唔夠班喺自由盃立足，作客招架唔住哥連泰斯猛攻，直取讓球主勝。

（周四早上9時開賽）