(六)54 車路士Vs史篤城：車仔雙星搵史篤城發洩

猪拉多纳

今晚英超由一哥車路士守尾門，坐鎮主場迎戰史篤城。車仔主力如夏薩特、法比加斯等喺啱啱為國效命踢到嬲爆爆咁，今仗遇上無欲無求嘅史篤城，佢哋滿腔怒火梗係做番齣好戲喇，不妨直取讓球主勝。

（now 621周日凌晨零時30分直播）
法比加斯夏薩特一肚氣

上半季表現弗爆嘅法比加斯，踏入下半季跌晒Watt判若兩人，受到外界非議，日前熱身賽為西班牙出戰荷蘭，佢難得打正選兼做隊長，卻冇貨交輸波收場，仲向記者發老脾終止訪問，睇得出佢壓力唔細。至於夏薩特喺比利時於歐國外對以色列中途被換出，賽後對主帥韋莫斯話佢攰影響表現嘅理由唔多滿意，覺得韋帥偏心另一中場迪布尼。的確，法比仔同夏薩特於國家隊地位唔及喺車仔，難怪踢到成肚火，好彩返到車仔有堅信任佢哋嘅領隊莫連奴，又可以踢番最擅長嘅位置，今仗仲唔威番鋪。

史篤城位居第十，既冇乜護級壓力，下屆歐洲賽席位亦唔輪到佢哋，依家處於踢風流波階段，戰意成疑。何況今季從車仔借來嘅翼鋒域陀摩西斯表現出色，史篤城主帥曉士打算將佢買斷，由於有求於人，今仗隨時做個順水人情，車仔就算有箭頭迪亞高哥斯達上陣成疑下亦可輕取對手，讓球主勝咪走雞。