卡卡獨力頂唔住伐木者

猪拉多纳

美職近年愈嚟愈有星味，例如有「狂牛射手」韋拿去咗紐約城、「神之子」卡卡加盟奧蘭多城，仲有最矚目嘅「神奇隊長」謝拉特今夏都會過檔洛杉磯銀河。不過足球係團體運動，唔係有一個球星加盟，隊波就即時「升呢」變勁旅，就好似卡卡効力嘅奧蘭多城，往往靠晒卡卡一個搵食，真係獨力難支，今場奧蘭多城作客波特蘭伐木者，難出現爆冷戰果，捧主勝。

（周一凌晨5時開賽）

波特蘭伐木者喺3月尾同加納國腳耶迪利正式簽約加盟，今場有望首次上陣，球隊上場終於開齋，球員士氣大振。相反奧蘭多城愈踢愈頹，入波、助力都淨係靠卡卡一個，其他隊友又唔生性，今場仲要有前鋒馬田柏達臣、中場柏度列比路、東尼卡斯奧等因傷上陣成疑，受讓都咪掂，一於簡簡單單博主勝！