曼城洩氣扑錘乏力

猪拉多纳

(日)22 曼城 VS 韋斯咸

今晚英超早場，衞冕機會渺茫嘅四哥曼城喺主場出戰「錘仔幫」韋斯咸，「藍月亮」戰績直線下滑，領隊比歷連尼嘅帥位危危乎，大軍士氣低落，雖然要贏波保住前四位置，但班波谷極都谷唔起，未必咬得入韋斯咸，轉捧受讓嘅「錘仔幫」讓球客勝。

（now 621周日晚8時30分直播）

曼城今季差強人意，大家最關心係主帥比歷連尼幾時食「豉椒炒魷」，同佢有牙齒印嘅車仔領隊莫連奴忽然扮好人，話「藍月亮」唔應該因近期戰績較差而踢走比帥，猶如貓哭老鼠假慈悲，適逢多蒙特教頭高普上周宣布教埋今季走人，成為接替比帥嘅大熱人選，而且曼城陣容年齡偏大，換血事在必行，你話唔影響大軍士氣就奇喇。
韋斯咸冇晒包袱

貴為上季盟主，排第4嘅曼城近6場聯賽輸咗4場，只係比第5嘅利物浦多4分，前四位置唔多穩陣，睇番上仗同市打吡戰反輸畀死敵曼聯，雖然眾將有心想打場爭氣波，奈何谷極都谷唔起，今仗仲有前鋒祖維迪及韋菲特邦尼因傷上陣成疑，要贏冇晒包袱嘅韋斯咸都唔易，不如轉玩「錘仔幫」有4.15倍嘅讓球客勝。