狐狸強勢 受讓要追

猪拉多纳

（六）25 般尼 Vs 李斯特城

當英超冠軍之爭差唔多塵埃落定，榜下游嘅護級大戰反而更有睇頭，今晚護級6分波，包尾嘅般尼會喺主場硬撼18位嘅「狐狸」李斯特城，般尼近期陷入入球荒，主力射手丹尼艾格斯死晒火，反而李斯特城連贏3場。識揀，梗係揀受讓嘅「狐狸」喇！

（now 622周六晚10時直播）

般尼同李斯特城由英冠爭到嚟英超，上季爭做英冠盟主，結果「狐狸」成功以9分之差力壓般尼贏得冠軍，而今季喺英超就力爭唔做「升降機」，睇嚟又係「狐狸」贏喎！由聯賽第13輪開始就一直做包尾大幡嘅李斯特城最近護級曙光重現，竟然連贏3場，入波亦唔少。踢波有時就係打道氣，依家李斯特城氣勢如虹，有得受讓咁筍梗係要捧喇！
包尾般尼前線死火

般尼22歲小將丹尼艾格斯首季踢英超就入咗9球，好多豪門都睇中咗呢位今夏就會成為自由身嘅英籍前鋒，不過唔知丹尼艾格斯係咪受到傳聞影響，近8場一球都入唔到，直接累到般尼呢8場只係入咗兩球咁大把，咁嘅攻力又點會贏到李斯特城呀？