哈神阿古獸爭金靴 熱刺曼城鬥「鋒」騷

猪拉多纳

嚟到季尾，熱刺主場對曼城呢場大戰睇落冇乜睇頭，熱刺爭前4無望，曼城又早早衞冕失敗，不過都無礙兩軍射手嘅爭勝心，位於神射手榜頭兩位嘅阿古路同哈利卡尼今晚直接交鋒，跌咗個橙執番個桔，攞唔到獎盃都要擸番個金靴獎返嚟，今晚大家等睇入球騷啦！

（now 621周日晚11時直播）

熱刺紅爆前鋒哈利卡尼依家入咗20個聯賽入球，落後曼城嘅阿古路1球，英國《每日郵報》早前就做咗個統計，發現「哈神」唔止入波多，含金量亦非常高，20球共為熱刺攞到22分，至於佢嘅隊友基斯甸艾歷臣亦唔曳，10個入波都為球隊帶嚟16分，睇嚟熱刺今場想攞分，都係要靠呢對「金毛孖寶」。
近6次對戰全開大

曼城今季四大皆空，球隊老化問題浮現，靠晒阿古路同大衞施華孭飛，「阿古獸」今季喺傷吓踢吓嘅情況下都入到21球，真係超勁。不過「藍月亮」嘅死穴始終係防守，喺隊長高柏尼、中場耶耶托尼缺陣嘅情況下，防線形同虛設，上仗主場對阿士東維拉領先兩球都畀人逼和，最尾贏波認真夠運。今場對住更堅嘅「哈神」同艾歷臣，條防線好難唔畀人玩殘囉！兩軍最近6次對戰全部開大，梗係再追啦！