哥連泰斯齊章開鑼戰睇高啲

猪拉多纳

當歐洲主要聯賽快要收咧之際，巴甲新一季就開咧，衞冕嘅高士路第一擊將喺中立場庫亞巴彭坦拿球場迎戰哥連泰斯，堂堂連續兩年巴甲冠軍，高士路今場竟然有得受讓，睇落有「景轟」！高士路嚟緊喺南美自由盃16強撼聖保羅，今場大有機會留力，平手盤阿King寧捧人腳較齊嘅哥連泰斯！

（周一凌晨3時開賽）

高士路上季兩大奪冠功臣艾華頓列比路同列卡度高拉特今年齊齊鬆人，翼鋒艾華頓列比路去咗阿聯酋掘金，而進攻中場高拉特就去咗中超嘅廣州恒大淘寶，高士路實力肯定受削，加上佢哋今場前中後都有主將休戰，包括巴迪斯達、阿里遜同達迪安達臣都因傷缺陣，而且佢哋喺自由盃16強首回合以1球不敵聖保羅，嚟緊周中就踢次回合，教頭馬些路奧利華拉今場好大機會留力，近兩次對碰都贏波嘅哥連泰斯有望偷雞得手。哥連泰斯雖然同樣要喺自由盃求翻盤，不過佢哋兵源相對充足，今場可以秤先。
法林明高添猛人可「保」不敗

講開巴甲仲有兩場好嘢，首先係早場嘅甘美奧主場對邦迪比達，甘美奧陣中多傷兵，分別有艾科亞、基斯頓洛迪古斯同拉美路賓尼迪，主場出戰都難攞甜頭，不如改捧細盤。最後就有聖保羅主場對法林明高，法林明高防守力強，又借得後衞柏拿同比爾辛，今場有力頂住聖保羅保持不敗，受讓值捧。