藍月亮盡情殺戮QPR

猪拉多纳

(日)19 曼城 VS 昆士柏流浪

英超早場曼城主場出戰尾二嘅昆士柏流浪（QPR），「藍月亮」今季四大皆空，不過王牌阿古路希望成為神射手攞尾彩，一定全力爭取士哥；QPR護級機會渺茫，撞正欲爭金靴嘅「阿古獸」，QPR整定冇運行，直取曼城讓球主勝。

（now 621周日晚8時30分直播）
阿古路盡數爭金靴

曼城今季確實差強人意，賽前王牌阿古路受訪時表示，雖然只有為球隊贏得冠軍嘅入波先至有價值，但如今既然冇盃落袋已成事實，佢就話惟有盡力打好餘下比賽，自己會全力爭金靴獎。依家阿古路以二十二球位列射手榜「冧巴溫」，甩開熱刺超新星哈利卡尼同車仔箭頭迪亞高哥斯達兩至三球，而且QPR對阿古路嚟講特別有意義，因為2011至2012年度煞科戰，曼城正正係靠阿古路補時最後一刻轟入致勝球，以3比2反勝QPR首度於英超封王。何況QPR近八仗贏得一場，狀態直插谷底，相信護級機會愈來愈微，加上守將奧奴夏今仗要坐波監，試問點頂得住呢隻搏盡數胡嘅「阿古獸」，要讓球主勝。