教訓鹹濕莊臣 阿仙奴讓主捉貓

猪拉多纳

阿仙奴今晚喺英超主場對新特蘭，打和嘅話，兵工廠就幾乎肯定至少拎到第3名，對手新特蘭就可以護級成功，不過阿仙奴領隊雲格自命清高，又點會同人打默契波？加上新特蘭有犯眾憎嘅阿當莊臣打番正選，睇怕兵工廠會開1.72倍「讓球主勝」教訓吓對方。

（now621台周四凌晨2:45直播）
雲格省招牌保住份工

日前阿仙奴作客以1:1逼和曼聯，繼續領前對方2分，剩低兩場袋多1分，就幾乎肯定至少拎到第3名，事關兵工廠喺得失球差上有7球優勢。只不過咁，傳聞非洲首富丹高迪有意入主阿仙奴，而且話明要換領隊，無論件事真定假，雲格都有需要省番靚招牌，避免自己冇得撈。

另一方面，「黑貓」新特蘭日前喺主場以0:0打和李斯特城，領先倒數第3位嘅侯城3分，今場和波已經肯定上岸，要護級成功唔難，但領隊艾禾卡特唔知做乜，突然放風話打算安排阿當莊臣打番正選，大家知啦，佢曾經因為涉嫌同未成年少女發生關係被捕，兵工廠又點會畀佢喺酋長球場亂嚟呀？