伊巴盡地一煲吼半場勝

猪拉多纳

伊巴神奇之旅一季玩完？希望唔係喇！「西甲勵志哥」伊巴今季季前靠住超過48個不同國家嘅球迷入股，成功解決資金問題，由西乙升上西甲，球隊依家力爭護級，今場收咧戰會喺主場迎戰已經鐵定降班嘅科爾多瓦，相信一眾球員將再次發揮「伊巴」精神，憑鬥志、決心力求來季繼續留喺西甲，今場主勝太熱，一於改捧半場主勝！

（now 633及TVB 13周日凌晨零時30分直播）

除咗包尾嘅科爾多瓦篤定降班外，另外兩支「陪葬」球隊仍屬未知之數，雖然CF格蘭納達同拉科魯尼亞都有34分，比伊巴同艾美利亞多兩分，但前兩者同艾美利亞皆要對戰前列球隊，相反伊巴只係面對無心戀戰嘅科爾多瓦，好大機會搶到3分喎！伊巴呢間名不經傳嘅小球會唔係靠大手筆引入球員，而係憑住球員自身嘅努力同成長升上西甲，今場關鍵一戰繼續靠鬥志搭夠，博伊巴半場搞掂對手！