阿根廷加納駁火大有睇頭

猪拉多纳

阿根廷近年參戰世青盃都成功「造星」，好似美斯、阿古路依家個個都獨當一面，而今屆大家就要留意佢哋嘅「馬體會孖寶」，分別係馬體會教練施蒙尼囝囝、前鋒基奧雲尼施蒙尼，同埋拍檔安祖哥利亞。今午喺B組迎戰加納U20，1.75倍入球大博得過。

（中央5台周二下午3:00直播）
馬德里孖寶有料到

咪以為阿根廷射手基奧雲尼施蒙尼全靠父蔭上位，查實呢位小將不知幾巴閉，佢喺今屆U20美洲國家盃幫國家隊奪冠之餘，自己仲攻入9球成為賽事神射手，經過上仗適應後今仗隨時開火。至於佢嘅拍檔安祖哥利亞喺上年轉投馬體會後，雖然未有表演機會，不過呢位新星喺上仗對巴拿馬就轟入兩球，功架盡現。有呢對「馬體會孖寶」傍住，使驚阿根廷會冇波入？

另邊廂嘅加納，陣中亦有唔少球員喺歐洲落班，當中以卡利亞里中場葛費特當沙最具名氣。呢位發電機今季為卡利亞里正選上陣超過10場，有入波亦有助攻，表現絕對唔曳。何況家陣B組4隊同得1分，今仗邊隊贏波即令出線機會大增，兩軍鬥攻自然多入球喇！
世青盃B組