牙買加細擒冇蘇烏拉圭

猪拉多纳

除咗阿根廷之外，今晚美洲國家盃B組仲有場「第一對第一」，由衞冕冠軍烏拉圭迎戰首次獲邀參戰美洲盃嘅牙買加。烏拉圭呢次放棄咗唔少老將，加上主力射手蘇亞雷斯冇份踢，攻擊力大打折扣，對住冇乜包袱嘅牙買加唔似數得起，2.05倍入球細有得諗。

（now681台周日凌晨3:00直播）
卡雲尼一個踢晒

蘇亞雷斯因為喺上屆世盃咬人一事被罰停賽，眾所周知「咬人蘇」傳射俱佳，近年已成為烏國重心，冇咗呢位國家隊史上入球最多前鋒幫手，烏拉圭變成利物浦第二跌Watt有乜咁奇。

況且教練泰巴利斯今屆放棄唔少老將，包括前隊長盧根奴、中場迪亞高佩雷斯、加根奴，而且老牌前鋒科蘭早喺3月宣布退出國家隊。換言之班波今屆靠晒前鋒卡雲尼撐住，都咪話唔牙煙，仲邊敢喺第一仗用殘佢先？

對手牙買加勝在冇壓力，而且唔少球員都喺英格蘭搵食，其中李斯特城後衞韋斯摩根、水晶宮守將馬里亞柏都叫做踢緊頂級聯賽，相信防線冇咁快會投降。尤其是賽前卡雲尼搞錯佢哋係非洲球隊，擺明當人冇到，一眾牙買加守將實唔放過佢都似。