老虎變髮哥倫比亞-1啱數

猪拉多纳

另一場C組賽事，由哥倫比亞對委內瑞拉。哥軍近年人才輩出，占士洛迪古斯、古達度、積臣馬天尼斯都効力歐洲大球會，上年世界盃已顯功架，今屆美洲盃仲有新形象示人嘅法卡奧助陣。呢位綽號「老虎」嘅射手，雖然喺曼聯冇作為，但返回國家隊，演出即生猛晒，必把握機會打翻身波，炒得起委內瑞拉，直取讓球主勝。（now 681周一凌晨3時直播）
委內瑞拉只屬陪跑

哥倫比亞上年打入世界盃8強，表現攻守兼備，可惜僅負巴西出局。不過唔緊要，陣中主力正值當打之年，汲取經驗後，今屆出戰美洲盃，更加令人期待。當中一定要提法卡奧，「老虎」過去一年非常黑仔，先係受重傷，無緣世盃，之後轉投曼聯，卻同球隊格格不入，影響發揮。幸好返回國家隊，即重拾射手觸覺，早前踢熱身賽，射入致勝一球，擊敗哥斯達黎加。法卡奧想離開曼聯，而車仔領隊莫連奴已經睇中佢，但呢位射手始終要交出成績，先至可以上「車」，所以一定要趁美洲盃顯身價。

至於委內瑞拉亦有多位球員喺歐洲搵食，但都係効力細球會，質素有限。委內瑞拉一直依賴嘅中場艾蘭高已經35歲，球隊開始有青黃不接問題，今屆陪跑居多。