幼獅食意粉好易骾親

猪拉多纳

哈利仔死火英格蘭讓唔起

今晚U21歐國盃B組有大戰上演，英格蘭U21對意大利U21，「幼獅」讓平半玩下盤好過，因為英格蘭U21有兩件進攻主力因傷玩完，唔通要熱刺射手哈利卡尼葉問上身，1個打10個咩？對家意大利U21已經被逼入死角，隨時爆發小宇宙呀！（開賽時間：周四凌晨2:45）
意大利要贏波先出線

英格蘭U21日前以1:0砌低瑞典U21，今場贏波就肯定出線，弊在翼鋒阿歷士比查特喺比賽中傷出，剩低啲波都唔使預佢，加上射手比拉希奴養傷冇歸隊，同時英格蘭U21連續兩屆分組賽出局，我就唔覺得淨係靠王牌哈利卡尼，可以做到救世主，畢竟佢連續兩場踢足全場都冇波入呀！

意大利U21上場以0:0打和葡萄牙U21，家陣得1分喺手，要出線今場非勝不可，或者會激發起佢哋鬥心。雖然意大利U21有中場史杜拿路繼續停賽，但佢哋有唔少球員，上季喺意甲打開正選，當中被祖雲達斯外借到薩斯索羅嘅射手杜文尼高貝拉迪，更加勁入15球，唔會咁易輸波囉！