國足主場強勢搶W

猪拉多纳

南韓新丁落場腳都震

東亞錦標賽今日輪到男足登場，東道主中國迎戰南韓！中國強陣出擊，有七位球員來自中超豪門FC廣州(廣州恒大淘寶)，力爭喺自己地頭捧盃威番一次。南韓並冇徵召歐洲兵團，當中唔少球員更加從未為國家隊上陣，領隊史泰歷克試陣味濃，戰意唔及國足，一於捧中國主W。

（now 633周日晚9時直播）

中國主帥比連今次徵召嘅大軍，以廣州恒大淘寶球員為主，包括中場鄭智、射手郜林、後衞馮瀟霆、門將曾誠，加上北京國安前鋒于大寶、山東魯能泰山射手楊旭，國足可謂精銳盡力。事實上，中央XX近年推行政策，支持足運發展，希望打入世界盃決賽周，無論大小賽事都會全力以赴，提升國足成績及形象，何況身為今屆東亞錦標主辦國更加唔衰得，勢必搏盡爭標。

反觀南韓領隊史泰歷克今次純粹畀一班土炮同邊緣國腳吸收比賽經驗，大軍名單球員分別來自南韓、日本及中國聯賽。最有國際賽經驗球員已經要數到効力恒大嘅守將金英權，以及蔚山現代前鋒金信煜，其他大部分球員上陣次數不足十次，甚至未有「喼帽」，切勿高估。
日本恃質夠贏北韓

另一場北韓對日本，上屆冠軍日本以全本土聯賽球員應戰，但仍包括宇佐美貴史、山口螢、森重真人、慎野智章等常規國腳，質素有保證。北韓缺少名將鄭大世，水準信唔過，揀日本客W。

（now 633周日晚6時20分直播）