華歷簡奴硬啃「中國元素」

猪拉多纳

中國元素喺西甲嘅影響力愈來愈大，著名第三方支付企業錢寶，上季已成為華歷簡奴同皇家蘇斯達嘅心口贊助商，今季更利用合約焗華奴借入中國球員張呈棟，令佢成為首位登陸西甲嘅中國球員，手緊嘅華奴冇得say no，雖然之前批評此決定嘅主帥占美斯轉晒軚讚番呢位中場，但明眼人一睇就知係睇錢份上喇。

相反，蘇斯達教頭莫耶斯有「吉士」得多，一早婉拒咗錢寶，畢竟「足球天才」喺02-03年度球季教愛華頓嗰陣，因贊助商要求硬食李鐵同李瑋鋒，只得李鐵勉強用咗一季便棄用，莫耶斯見過鬼仲唔怕黑咩。查實占美斯一向以鐵腕見稱，唔啱使就天王都冇面畀，張呈棟隨時步同胞張稀哲上季於禾夫斯堡一場未踢過嘅後塵。