防線跌Watt巴塞衞冕艱辛

猪拉多纳

巴塞隆拿上季以「MSN」組合橫掃歐洲，再一次成為三冠王，不過由於轉會禁令，令巴塞季初只可繼續靠「MSN」組合打天下，加埋球隊喺歐超盃同西超盃喪失波，防線明顯大跌Watt，嚟緊巴塞衞冕之路唔易行喎！

講攻擊力，可以同「MSN」美斯、蘇亞雷斯及尼馬匹敵嘅鋒線組合唔多，不過佢哋是旦一件受傷嘅話，就好難搵人代替到。偏偏球隊受到轉會禁令影響，今季引入中場阿達杜倫、可翼可衞嘅阿歷斯維度都得物無所用，要等到下年先可以落場幫手，絕對考驗教練安歷基調兵遣將能力。

更大鑊嘅係，巴塞早前喺歐超盃同西超盃3場比賽中，合共失咗9球咁多。計落後防主力丹尼爾、馬斯真蘭奴上年夏天踢咗世界盃，今夏又要應付美洲國家盃，連續兩年未有好好休息，新一季對呢兩位年過30嘅老將嚟講，肯定係一大考驗。咪忘記佢哋仲有位「神經門將」達史特根，呢位德國門將早前西超盃首回合鬥畢爾包「懶醒」咁走出禁區解圍，點知出事畀對手笠入。成條巴塞防線危危乎，真係好難畀到人信心。
「紅褲定律」博威多鋪

「地上最強」都知今季勁惡搞，所以佢哋決定使出秘密武器增加球隊奪標機會。原來巴塞對上兩次穿上紅褲比賽嘅球季（05至06、10至11），最終都可高舉聯賽同歐聯獎盃，成為雙料冠軍。巴塞今季再次着上紅褲出戰，即管睇吓「地上最強」可唔可以威多鋪。