尹戈爾玩輪換 紅魔咬唔入米堡

猪拉多纳

英聯盃16強直播戲碼，曼聯坐鎮主場迎戰英冠仔米杜士堡。紅魔日前於打吡遭死敵曼城悶和，耗力唔少，亦暴露出不擅破鐵桶陣嘅毛病，撞正由「寸王」莫連奴徒弟卡蘭卡帶領嘅米堡，隨時又老鼠拉龜冇碇埋手，米堡受讓必捧讓球客勝。

（TVB 301周四凌晨4時直播）

曼聯剛喺英超遭曼城悶和0比0，右閘路爾斯華倫西亞更勇戰受傷，達美安今晚會頂佢個位。曼聯始終要幾線作戰，點都要作出取捨，據英國傳媒揣測，領隊尹戈爾想讓大部分喺曼市打吡擔正嘅球員抖吓，預期卡域克、費蘭尼同迪比等會正選落場。睇番上仗受制於曼城派出耶耶托尼、費蘭甸奴同費蘭度法蘭斯高組成嘅三防中打法，曼聯空有控球卻打唔穿對手嘅層層防線。

反觀英冠嘅米堡當正今鋪決賽咁踢，更重要係主帥卡蘭卡，唔單止於球員時代為皇馬贏過歐聯冠軍，喺「銀河艦隊」做助教嗰陣師從莫連奴，深得「寸王」嘅「泊大巴」秘技，絕對唔怕曼聯於外圍搓搓搓，呢支英冠「四哥」早排喺各項賽事錄得7連勝，雖然一度陷入低潮，但上輪聯賽就大勝狼隊3比1，及時復甦。同時曼城又出手相助，啱啱將阿根廷中場般奴蘇古連尼借畀米堡，如果趕及註冊隨時可披甲。
米堡逾萬fans訪奧脫福

查實今場波兩周前開售波飛，轉頭已經畀米堡球迷認購晒8600張客場配額門票，於是曼聯畀多1450張配額佢哋，預期話咁快又會售罄。今晚米堡將會破球會紀錄有1萬粉絲隨隊作客，聲勢浩大。況且英格蘭盃賽出名係爆冷溫床，米堡一心死守下有力頂住紅魔，讓球客勝有2.88倍值得捧場。