貝迪斯Hea踢利雲特平手抵玩

猪拉多纳

05/03/2012
文： 走肖

有冇心搏，其實唔難睇得出，就好似西甲球隊貝迪斯今季爭唔到入前列，又唔憂會降班，最近竟然無厘頭答應去中東踢表演賽，擺明搵錢至上，聯賽唔使降班就冇有怕。利雲特（圖左）今晚喺西甲主場對貝迪斯，有機會趁對手Hea踢搶分，平手捧得過。（開賽時間：周二凌晨4:00）


爭歐洲賽資格搏老命


上星期利雲特喺聯賽作客以2:1砌低愛斯賓奴，先至終止連盃賽在內連續8場不勝，而且呢場有射手干尼養傷，中場法連奴斯停賽，睇落真係唔多捧得過。不過咁，利雲特畢竟有機會爭踢下屆歐洲賽，唔似會放軟手腳，而且中場魯賓蘇亞雷斯今季腳風勁順，有機會吸引大球會收購，照計佢會繼續搏命。




另一方面，貝迪斯表現勁飄忽，衰完冇耐近3場聯賽又有2勝1和，但要留意嘅係，踢埋呢場貝迪斯要喺主場硬撼皇家馬德里，作為貝迪斯管理層，打沉皇馬當然威過砌低利雲特好多，所以呢場勒住唔奇。仲有呀，其實貝迪斯對完「銀河艦隊」後，就會冇厘頭飛到中東踢表演賽，有心爭上前列，邊會咁樣o架？