車仔弱細標晒翰

猪拉多纳

06/03/2012
文： 蘇豪

今晚有場英格蘭足總盃第五圈重賽，英超名牌車路士作客英冠大軍伯明翰，「車仔」主帥保亞斯終於下台，但隊內球員分黨分派，究竟能否傾掂數大和解，實成一大疑問，以車仔近期客場表現，今場睇怕都係老鼠拉龜，捧細啦！（now 671及672周三凌晨3時45分直播）




保亞斯倒台後，有媒體解讀為車路士球員抗戰勝利，林柏特、艾辛及A高等「反保」人士當然開晒香檳慶祝，不過，並非所有「車仔」球星都「反保」，巴西中堅大衞雷斯日前公開狂插林柏特，「挺保」立場鮮明，家陣佢失去靠山勢被排斥，事實上，隊內仲有多個幫派，個個立場不一，點樣一條心爭勝？


咬唔入死守伯明翰


假設車路士眾星生生性性暫時嚟個大和解，亦不表示球隊即刻會有脫胎換骨演出，畢竟「車仔」現時面對太多問題，前線射手杜奧巴今非昔比，「王子」費蘭度托利斯信心盡失，林柏特今季踢吓停吓不在最佳狀態，前面得桑馬達同史杜列治較為sharp醒，今次面對存心死守嘅伯明翰，唔係話入就入囉！




睇番雙方上次交手時，車路士半場落後一球，換邊後僅憑史杜列治扳平逼和對手，主場出戰都踢到咁，作客更加唔好有太大期望。




「車仔」近六次作客贏一場，加埋只入三球，一球係對手擺烏龍，一球係十二碼，反映大軍客場攻力真係好弱，玩入球細穩陣。