華斯高回勇地頭開餐

猪拉多纳

06/03/2012
文： 走肖

自由盃聽朝有3場分組賽上演，其中首戰落筆打三更嘅華斯高同利馬聯，會喺E組狹路相逢。利馬聯近排受欠薪事件困擾，今仗遠征去到巴西，睇怕都係等炒，捧華斯高1.67倍「讓球主勝」！（開賽時間：周三早上8:45）


P祖 魯度夫傷愈


巴甲勁旅華斯高首戰主場以1:2不敵蒙特維多國民隊，搞到一地眼鏡碎。好彩佢哋喺之後嘅巴西州聯賽，一口氣取得5勝1和1負，狀態回勇。雖則佢哋件射手達奴里奧受重傷休戰半年，好彩仲有大把入波高手，隊長「P祖」祖連奴比南布肯奴同防線主力魯度夫又及時傷愈，主場出擊，要大勝一場唔難吖！




對家利馬聯所屬嘅秘魯超級聯賽爆出集體欠薪潮，聖馬田大學已經宣布唔玩，據聞利馬聯都係無良僱主之一，前鋒莊尼亞蒙坦仲一度威脅唔會隨軍出征添。家陣利馬聯士氣低落立立亂，新季開咧2輪只得1和1負，更當黑係佢哋日前出發去巴西，竟然因機位不足，至少有6名球員要遲啲先抵埗會合大軍，嚴重影響備戰，仲邊有機會偷雞呀！