蝙蝠洞專困弱者 華倫豪歎燕窩

猪拉多纳

08/03/2012
文： 笛子波童

歐霸盃十六強首回合，西班牙華倫西亞主場迎戰荷蘭燕豪芬，華倫今季踢盃賽主場特別惡，燕豪芬剛喺聯賽大敗二比六，士氣、信心皆受挫，1.55倍主W捧得過。（有線64及204台周五凌晨4時05分直播）




「蝙蝠兵團」華倫西亞目前喺西甲排第三，領先第四嘅利雲特五分，奪取來屆歐聯參賽資格基本上好穩陣，現階段可以專心應付歐霸盃。華倫今季喺主場出戰盃賽成績有保證，總計歐洲賽及西班牙盃踢八場，取得六勝兩和不敗成績，兩場和波對手分別係巴塞隆拿及車路士，實力稍弱嘅隊伍嚟到「蝙蝠洞」都唔易全身而退。




燕豪芬荷甲大敗失信心




燕豪芬今季歐霸盃十戰未輸過，但對手大部分都係歐洲二流球隊，不宜盡信。燕豪芬喺剛過去周日聯賽以二比六大敗於爭標勁敵川迪腳下，今季主場首次輸波，最慘係球隊下半場比對手多踢一人都佔唔到乜嘢優勢，相信對球員信心多少有影響，今次作客實力明顯高一班嘅華倫，預料都係凶多吉少。