熱捧鯨魚冷敲紅鑽

猪拉多纳

09/03/2012


今季日職唔知大家認為邊隊有冠軍相呢？近幾季日職盟主，嚟嚟去去都係名古屋鯨魚、柏雷素爾、大阪飛腳、鹿島鹿角、浦和紅鑽，相信今季都離唔開呢幾隊，不如趁早買2.6倍嘅鯨魚，敲28倍嘅紅鑽。




論近年日職表現最穩定嘅球隊，鯨魚可以話首屈一指，近4年冠亞季各一次，全賴教頭史杜高域嘅英明領導，佢為球隊注入多元化嘅進攻模式，無論約舒亞堅尼地定玉田圭司，總能交出穩定入球率，加上有田中鬪莉王喺後防一夫當關，難怪鯨魚被視為奪標大熱。




如果怕鯨魚分心亞冠盃，倒不如考慮下紅鑽，經過上季災難性演出後，今季痛定思痛積極增兵，加入兩名從德甲科隆和英冠李斯特城回流嘅國腳級猛將槙野智章及阿部勇樹，並禮聘三箭有料教練柏高域，重整旗鼓或有驚喜。